Ağstafada mikroavtobusla minik maşını toqquşdu: XƏSARƏT ALANLAR VAR

Ağstafada yol-nəqliyyat hadisəsi baş verib.

Gundem.today xəbər verir ki, hadisə bu gün saat 11:30-da Bakı-Qazax magistral yolunun rayon ərazisindən keçən hissəsində qeydə alınıb.

Hadisənin baş verməsinə səbəb 99-QX-689 dövlət nömrə nişanlı "Mercedes Vita" markalı mikroavtobusla, 20-BD-093 dövlət nömrə nişanlı VAZ-2106 markalı minik avtomobilinin toqquşması olub. Hadisə yerinə polis əməkdaşları cəlb ediliblər.

Gundem.today-ın sorğusuna cavab olaraq Ağstafa və Qazax Rayon Mərkəzi Xəstəxanalarının birgə məlumatında bildirilib ki, martın 24-də saat 12:15 radələrində baş verən yol-nəqliyyat hadisəsi səbəbi ilə xəsarət alan iki nəfər (bir kişi, bir qadın) Ağstafa Rayon Mərkəzi Xəstəxanasına hospitalizasiya olunub.

"Alının sağ yarısının sıyrılmış yarası diaqnozu təyin olunan 1978-ci il təvəllüdlü şəxsin (qadın) vəziyyəti qənaətbəxş qiymətləndirildiyi üçün ambulator müalicə üçün evə buraxılıb. 1972-ci il təvəllüdlü şəxsə isə (kişi) qapalı kəllə-beyin travması, sol körpücük sümüyünün çiyin oynağından çıxığı diaqnozları təyin edilib. Şəxsə ilkin tibbi yardım göstərilib, vəziyyəti orta-ağır qiymətləndirilən şəxs öz istəyi ilə saat 12:50-də Qazax Rayon Mərkəzi Xəstəxanasına aparılıb.

Müalicəsi Qazax Rayon Mərkəzi Xəstəxanasının Təcili tibbi yardım şöbəsində davam etdirilir. Vəziyyəti orta-ağır qiymətləndirilir", - deyə məlumatda bildirilir.

Xəbər maraqlı gəlib? Sosial şəbəkələrdə paylaşın