Kompüterdə işləyənlər üçün göz xəstəlikləri riski: Quru göz sindromu və miopiyadan necə qorunmalı?

"Monitor önündə saatlarla vaxt keçirmək, iş mühitindəki zəif işıqlandırma və düzgün olmayan baxış məsafəsi göz quruluğu, akkomodasiya spazmı və miopiya (yaxından görmə) kimi problemlərin yaranma ehtimalını artırır.

Gundem.today xəbər verir ki, bu barədə "Lenta.ru" saytına rusiyalı oftalmoloq Oksana Kuznetsova danışıb.

Mütəxəssisin sözlərinə görə, görmə orqanlarında bu növ xəstəliklərin yaranma təhlükəsi monitor önündə fasiləsiz iş, yetərsiz işıqlandırma, ekranla göz arasındakı məsafənin düzgün seçilməməsi, həmçinin yuxusuzluq, stres və iş-istirahət rejiminin pozulması səbəbindən yüksəlir.

Həkim ekranın optimal mövqedə yerləşdirilməsini məsləhət görür: monitor gözlərdən 45-70 santimetr aralıda yerləşməli, otaqdakı işıq bərabər və dağınıq şəkildə yan tərəfdən düşməli, ekranda isə parıltılar olmamalıdır.

O qeyd edib ki, gözlərdəki yorğunluğu aradan qaldırmaq üçün "şüşədəki nöqtə" gimnastikasından istifadə etmək olar: "Pəncərə şüşəsinə plastilin və ya kağızdan xırda qırmızı nöqtə yapışdırın, ondan 50-70 sm aralıda əyləşin və ya ayaqüstə durun. Bir gözünüzü yumaraq 30 saniyə nöqtəyə, daha sonra 30 saniyə uzağa (pəncərədən kənara) baxın. Ardından eyni hərəkəti digər gözünüzlə təkrarlayın". Bu məşq göz əzələlərini növbə ilə gərginləşdirib yumşaltmağa kömək edir, həmçinin baxışı yaxından uzağa cəmləmək bacarığını inkişaf etdirir.

Oftalmoloq xəbərdarlıq edib ki, gözlərdə quruluq hiss edildikdə nəmləndirici damcıları özbaşına seçmək olmaz. Çünki bu cür əlamətlər konyunktivit və ya digər iltihabi oftalmoloji xəstəliklərin xəbərçisi ola bilər.

Xəbər maraqlı gəlib? Sosial şəbəkələrdə paylaşın