Ronaldu və Portuqaliya millisinin üst-üstə düşməyən dövrləri - Əfsanəvi futbolçu niyə dünya kubokunu qazana bilmədi?

2006-cı ildə Almaniyada keçirilən dünya çempionatı Kriştianu Ronaldunun mundial karyerasının başlanğıcı idi. Həmin vaxt cəmi 21 yaşı olan hücumçu Portuqaliyanın yarımfinala yüksəlməsində mühüm rol oynamışdı. O vaxt futbol ictimaiyyətində belə bir fikir hakim idi ki, bu, sadəcə başlanğıcdır, qarşıda onu daha bir neçə dünya çempionatı gözləyir və gec-tez futbolun ən böyük kuboku da Ronaldunun karyerasının təbii davamına çevriləcək. İyirmi il sonra məlum oldu ki, futbolda ən məntiqli görünən proqnozlar belə gerçəkləşməyə bilər.