Vaşinqton Tehranın planını rədd edir: Gərginlik artır

ABŞ Prezidenti Donald Tramp Vaşinqtonun münaqişənin nizamlanması ilə bağlı təkliflərinə İranın cavabını çətin ki, qəbul edəcəyini bildirib. Onun fikrincə, Tehran hələ kifayət qədər yüksək bədəl ödəməyib.

Gundem.today xəbər verir ki, Tramp bu barədə "Truth Social" platformasında paylaşım edib.

"Tezliklə İranın bizə yenicə göndərdiyi planı nəzərdən keçirəcəyəm. Lakin bu planın məqbul olacağını təsəvvür edə bilmirəm. İran hakimiyyəti son 47 ildə bəşəriyyətə və dünyaya etdiklərinə görə hələ kifayət qədər yüksək bədəl ödəməyib", - deyə amerikalı lider vurğulayıb.

ABŞ prezidenti əlavə edib ki, onun administrasiyası İranla elə bir saziş bağlamaq istəyir ki, bu, bir neçə ildən sonra yeni müharibənin qarşısını almağa imkan versin.

Mətbuat nümayəndələri Trampdan onun İranla saziş bağlamaq cəhdlərindən tamamilə imtina edə biləcəyi barədə əvvəlki bəyanatını şərh etməyi xahiş ediblər. Buna cavab olaraq o bildirib:

"Mən bunu deməmişəm. Demişdim ki, əgər biz indi geri çəkilsək, onların bərpa olunması üçün 20 il vaxt lazım olacaq. Lakin biz geri çəkilmirik. Biz bunu elə edəcəyik ki, iki, üç və ya beş ildən sonra heç kim geri qayıtmalı olmasın".

İran ABŞ-yə döyüş əməliyyatlarının tam dayandırılması üçün 14 maddədən ibarət "yol xəritəsi" təqdim edib.

Gundem.today xəbər verir ki, bu barədə "Fars" agentliyi məlumat yayıb.

Bildirilib ki, sənəd Pakistan vasitəsilə Vaşinqtona çatdırılıb. İran tərəfi bunu ABŞ-dən daha əvvəl daxil olan 9 maddəlik təşəbbüsə cavab olaraq hazırlayıb.

Məlumata görə, İranın təqdim etdiyi sənəd təkcə tələbləri əks etdirmir, həm də mərhələli nizamlanma planını ehtiva edir. Lakin sənədin detalları hələ açıqlanmayıb.

Qeyd olunur ki, tərəflər arasında birbaşa danışıqlar aparılmasa da, vasitəçilər üzərindən dialoq davam edir. İranın bu təşəbbüsü müvəqqəti razılaşmalardan fərqli olaraq, münaqişənin tam həllinə yönəlmiş addım kimi qiymətləndirilir.

Xəbər maraqlı gəlib? Sosial şəbəkələrdə paylaşın