ABŞ-nin raket ehtiyatlarının bərpası illər çəkəcək

ABŞ-nin İrana qarşı hərbi əməliyyatlar zamanı istifadə etdiyi raket ehtiyatlarının bərpa olunması illər tələb edəcək.

Gundem.today xəbər verir ki, bu qənaətə Strateji və Beynəlxalq Tədqiqatlar Mərkəzinin mütəxəssisləri gəliblər. Aprelin 21-də təqdim olunan hesabatda qeyd edilir ki, İran ərazisinə endirilən 39 günlük zərbələr ərzində ABŞ külli miqdarda "Tomahawk" və "JASSM" qanadlı raketlərindən, yaxınmənzilli "Precision Strike Missile" (PrSM) ballistik raketlərindən, çoxməqsədli "SM-6" raketlərindən, "SM-3" önləyicilərindən, həmçinin "THAAD" və "Patriot" kompleksləri üçün nəzərdə tutulan raketlərdən istifadə edib. Analitiklər bildirirlər ki, bu yeddi növ silah ehtiyatının müharibədən əvvəlki səviyyəyə qaytarılması bir ildən dörd ilə qədər vaxt aparacaq.

"Sakit okeanın qərb hissəsində baş verə biləcək hər hansı münaqişə zamanı bu raketlər mühüm əhəmiyyət kəsb edəcək. Hətta İrana qarşı müharibədən əvvəl belə, bərabərgüclü rəqiblə döyüş şəraitində onların ehtiyatı kifayət etməyən hesab olunurdu. İndi isə bu qıtlıq daha kəskin xarakter alıb və ehtiyatların yenidən doldurulması əlavə vaxt tələb edəcək", - deyə hesabatda vurğulanır.

Ekspertlərin sözlərinə görə, mövcud ehtiyatlar İrana qarşı hərbi əməliyyatları davam etdirmək üçün yetərlidir, lakin onlar gələcək münaqişələr üçün müəyyən risklərin mövcudluğunu qəbul edirlər. Bununla yanaşı, vurğulanır ki, "Patriot", "THAAD" sistemləri üçün raketlərin və "PrSM" döyüş sursatlarının İranda fəal tətbiqi ABŞ-nin Ukrayna, eləcə də digər müttəfiq və tərəfdaşlarına silah tədarük etmək imkanlarını sarsıdır.

Xəbər maraqlı gəlib? Sosial şəbəkələrdə paylaşın