Abşeronun Məmmədli kəndində yağışdan sonra ACINACAQLI VƏZİYYƏT: Sakinlər evlərindən çıxa bilmirlər

Məmmədli kəndində yağan intensiv yağışlardan sonra yaranan vəziyyət sakinlərin ciddi narazılığına səbəb olub.

Bu barədə Gundem.today-a şikayət daxil olub.

Qeyd olunub ki, yağışdan sonra kəndin bir çox küçə və həyətləri su altında qalıb, yollar keçilməz hala düşüb.

"Əraziyə toplanan yağış suları hərəkəti tamamilə iflic edib. Həyətlər, küçələr su altında qalıb. Evdən çıxıb yolu piyada keçmək mümkün deyil, əraziyə heç bir avtomobil girə bilmir. Palçıq, su dizdəndir. Qalmışıq çıxılmaz vəziyyətdə. Hər dəfə yağıntıdan sonra bu problem təkrarlanır. Dəfələrlə aidiyyəti qurumlara - icra hakimiyyətinə və Fövqəladə Hallar Nazirliyinə (FHN) müraciət etmişik. Bu günə kimi nə əraziyə baxış keçirən var, nə də problemi aradan qaldırmağa çalışan", - deyə şikayətdə bildirilir.

Gundem.today-ın sorğusuna cavab olaraq FHN-in Mətbuat Xidmətindən bildirilib ki, onlar ancaq xilasetmə işlərinə cavabdehdirlər.

"Mövcud qanunvericiliyə, o cümlədən "Yerli icra hakimiyyətləri haqqında Əsasnamə"yə əsasən, qeyd etdiyiniz məsələ FHN-in deyil, yerli icra hakimiyyəti strukturları, o cümlədən su-kanalizasiya təchizatı qurumlarının vəzifələrinə aiddir. Subasma ilə əlaqədar evlərini tərk etməkdə çətinlik çəkən vətəndaşların təxliyəsi isə onların müraciəti əsasında tərəfimizdən həyata keçirilir", - deyə açıqlamada bildirilib.

Məsələ ilə bağlı Abşeron Rayon İcra Hakimiyyətinə də sorğu verilib.

Xəbər maraqlı gəlib? Sosial şəbəkələrdə paylaşın