Autizmli uşaq danışmırsa nə etmək lazımdır? - FOTO

"Autizm sindromlu uşaqlarda sosial ünsiyyət pozğunluqları, beyinin səsli informasiyalarının çətinliklə qavranılmaması, sensor həssaslığının həddindən artıq yüklənməsi və ünsiyyət üçün motivasiyanın olmaması səbəbindən nitq inkişafdan qala bilir".

Gundem.today xəbər verir ki, bu fikirləri Səhiyyə Nazirliyinin rəsmi "Instagram" hesabında keçirilən canlı yayım zamanı qurumun Respublika Psixi Sağlamlıq Mərkəzinin loqopedi Aygün Ələkbərova açıqlayıb.

Mütəxəssis qeyd edib ki, çox vaxt uşaq danışmırsa, ilk növbədə loqopedlər yada düşür, amma unudulmamalıdır ki, nitq, adətən, anlamaqdan aktiv istifadəyə doğru irəliləyir:

"Əgər yuxarıda sadaladıqlarımızdan biri müşahidə olunarsa, nitq anlayışını, nitqin anlamasını inkişaf etdirmək mümkün olmur. Uşaqların səsli nitqə marağını oyatmaq və böyüklərin nitqini dinləmək bacarığını inkişaf etdirmək üçün təqlid bacarığı olmalıdır.

Autizm sindromlu uşaqlarda nitq mənimsənilməsi çətin olan sosial alətə çevrilir.

Ona görə də, bir çox uşaqlar qeyri-verbal ünsiyyətdən (jestlər, kartlar) istifadə etməklə istəklərini bildirirlər. Çox əfsuslar olsun ki, aşağı potensiallı autizm sindromlu uşaqlarda verbal ünsiyyətin inkişafı müşahidə olunmaya da bilər. Amma yüksəkpotensiallı autizm uşaqlarda zamanında düzgün tibbi və psixopedaqoji müdaxilələr olunarsa, nitqin dinamikası müşahidə olunur. Məsələn, Asperger sindromlu uşaqlar əla mexaniki yaddaşa sahibdirlər, həvəslə, ədəbi dildə danışa bilirlər, lakin söhbəti axıcı, maraqlı, davamlı etdirməkdə çətinlik çəkirlər. Autizm sindromlu uşaqlarla peşəkar psixopedaqoji komanda çalışmalı, ailələri isə hər zaman sevgi və dəstəklərini əsirgəməməlidirlər".

Xəbər maraqlı gəlib? Sosial şəbəkələrdə paylaşın