Cənubi Koreyada kütləvi tətillər "Samsung" şirkətini vurdu

Əməkhaqqının artırılmasını tələb edən işçilərin kütləvi tətili nəticəsində "Samsung" şirkətinin Cənubi Koreyadakı müəssisələrində istehsal göstəriciləri ciddi şəkildə aşağı düşüb.

Gundem.today xəbər verir ki, bu barədə "Reuters" agentliyi məlumat yayıb.

Bildirilib ki, "Pxyontek" sənaye kompleksində müqaviləli mikrosxemlərin buraxılış həcmi 58%, yaddaş çiplərinin istehsalı isə 18% azalıb. Bu geriləmə işə çıxmayan işçi heyətinin böyük bir hissəsinin yoxluğu ilə əlaqələndirilir. Şirkətin həmkarlar ittifaqı bildirir ki, zavodlar sutkaboyu üçnövbəli rejimdə fəaliyyət göstərir və bir növbənin buraxılması ümumi istehsal həcminə birbaşa təsir edir. Bununla yanaşı, digər növbələrdə iş yükünün artırılması hesabına qismən kompensasiya edilməsi ehtimalı var. Mövcud rəqəmlər məhsuldarlığın qısamüddətli azalmasını əks etdirir.

Şirkət həmkarlar ittifaqının qiymətləndirmələrini nə təsdiq, nə də təkzib edərək rəsmi şərhlərdən çəkinib. Gələcək gərginliyin artması məsələsi isə açıq qalır: danışıqlarda irəliləyiş olmayacağı təqdirdə, həmkarlar ittifaqı mayın 21-dən etibarən uzunmüddətli tətilin başlanmasını istisna etmir.

Etiraz aksiyasını 30 mindən çox işçi və həmkarlar ittifaqları dəstəkləyib. Onlar şirkətin proqnozlaşdırılan əməliyyat mənfəətinin 15%-nin işçilərə ayrılmasında israr edirlər. Pul ifadəsində bu, təxminən 40 trilyon von (təqribən 27 milyard dollar) məbləğində ola bilər ki, bu da hər bir işçi üçün potensial olaraq 400 min dollara qədər ödənişə bərabərdir.

Xəbər maraqlı gəlib? Sosial şəbəkələrdə paylaşın