Danimarka millisinin yarımmüdafiəçisi Kristian Eriksen oyun vaxtı huşunu itirdi - VİDEO

Danimarka millisinin yarımmüdafiəçisi Kristian Eriksen Ukrayna yığmasına qarşı keçirilən yoldaşlıq matçında huşunu itirib.

Gundem.today xəbər verir ki, hadisə Danimarkanın Odense şəhərində yerləşən "EWII Park" stadionunda baş tutan qarşılaşmanın ikinci hissəsində qeydə alınıb.

Futbolçunun yıxılmasından sonra ona uzun müddət tibbi yardım göstərilib. Qarşılaşma 75-ci dəqiqədə, hesab 2:1 Danimarka millisinin xeyrinə olarkən dayandırılıb və daha sonra davam etdirilməyib.

Bundan sonra Danimarka millisinin mətbuat xidməti Kristian Eriksenin vəziyyəti ilə bağlı açıqlama yayıb.

"Kristian Eriksen özünü yaxşı hiss edir. Matç isə ləğv olunub", - deyə açıqlamada bildirilib.

Qeyd edək ki, Eriksen 2021-ci ildə Avropa çempionatında Finlandiya millisinə qarşı keçirilən oyunda da meydanda huşunu itirmişdi. Sonradan futbolçunun ürəkçatışmazlığı keçirdiyi məlum olmuş, həyati təhlükə yaradan aritmiyaların qarşısını almaq məqsədilə ona kardioverter-defibrilyator implantasiya edilmişdi.

34 yaşlı yarımmüdafiəçi hazırda Almaniyanın "Volfsburq" klubunda çıxış edir. O, karyerası ərzində "Ayaks", "Tottenhem", "İnter", "Brentford" və "Mançester Yunayted" kimi klubların da formasını geyinib.

Xəbər maraqlı gəlib? Sosial şəbəkələrdə paylaşın