İnsanları müalicə edən itlər özləri nə hiss edir?

İnsanlar çox vaxt itlərlə vaxt keçirməkdən hüzur tapırlar. Bəs bu dördayaqlı dostlarımız terapevt rolunda çıxış edərkən və insanlara dəstək olarkən həzz alırlarmı? Niderlandlı tədqiqatçılar məhz bu suala cavab tapmaq qərarına gəliblər.

Gundem.today psychologytoday.com saytına istinadən xəbər verir ki, müalicəvi əhəmiyyət daşıyan terapiya itlərini xəstəxanalarda, həbsxanalarda, yanğından mühafizə idarələrində və digər təşkilatlarda görmək mümkündür. Onlar adətən insanların gərginliyini azaltmağa və əhvallarını yüksəltməyə kömək edirlər.

Niderlandlı mütəxəssislər itlərin bu prosesdəki rifahını araşdırmaq üçün 63 terapiya itinin cəlb olunduğu xüsusi eksperiment keçiriblər. Tədqiqatçılar itlərin xəstələri sakitləşdirdiyi 837 fərqli seansın videoqeydlərini təhlil ediblər. Analiz zamanı heyvanların emosiyalarını qiymətləndirmək üçün quyruq bulama, əsnəmə, tezləşmiş tənəffüs və digər 19 fərqli reaksiyanı özündə cəmləşdirən davranış etoqramlarından istifadə edilib.

Nəticələr göstərib ki, hər bir it insanla təmasa fərqli reaksiya verir. Ən çox rast gəlinən davranışlar arasında oynamaq həvəsi və insanı sakitləşdirmə cəhdləri olsa da, bəzi hallarda heyvanlarda təşviş və qərarsızlıq müşahidə olunub.

Tədqiqatçılar müəyyən ediblər ki, terapiya itinin fəaliyyət zamanı özünü yaxşı hiss etməsi birbaşa onun yaşından, keçmiş təcrübəsindən və cinsindən asılıdır. Məsələn, daha yaşlı heyvanlar sakit olsalar da, oyunlara az meyl göstəriblər. Bundan əlavə, həm dişi, həm də erkək fərdlərin azyaşlı uşaqlarla təmas zamanı daha çox narahatlıq hiss etdiyi məlum olub.

Alimlər qeyd edirlər ki, itlərin rifahını qorumaq üçün hər heyvan üçün ən uyğun tapşırıqları müəyyənləşdirmək, terapiya seanslarını diqqətlə planlamaq və iş qrafikinə ciddi nəzarət etmək vacibdir.

Xəbər maraqlı gəlib? Sosial şəbəkələrdə paylaşın