Qərbi Azərbaycanın Novruz sirləri: "Yalan yuma" mərasimi və cıdır tamaşaları - VİDEO

Baku TV-də Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında "İrsimiz" rubrikasının növbəti buraxılışı hazırlanıb.

Buraxılışda filologiya üzrə fəlsəfə doktoru Aytən Cəfərova Qərbi Azərbaycanda cıdır tamaşalarından söz açıb.

O, gilas yetişənə qədər bayramlaşmaq adətinin mənası, kosa-keçəl mərasimi qədim türk təfəkkürünün hansı qatlarını üzə çıxarması, Novruzdan sonra suya danışılan yalanların sirri, eləcə də səməninin niyə məhz axar suya atılması ilə bağlı suallara aydınlıq gətirib.

A.Cəfərova bildirib ki, Qərbi Azərbaycanda cıdır tamaşaları Novruzda güc nümayişi anlamı daşıyır: "Novruzdan 13 gün sonra "yalan yuma" mərasimi keçirilir. Novruzun gizli ayinləri və suya danışılan yalanların sirri böyükdür. Qərbi azərbaycanlıların Novruz süfrəsində fərqli dadlar və mənalar olur. Buğakar pirində 40 gecə yatmaq inancının mənası ziyarətgahda gerçəkləşən arzu ritualıdır."

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Xəbər maraqlı gəlib? Sosial şəbəkələrdə paylaşın