Sadə pəhriz, sürətli nəticə: Arıqlamanın gizli formulu ortaya çıxdı

Yeni araşdırmalar göstərir ki, qida rasionunu tez-tez dəyişməyən və gündəlik kalori miqdarını sabit saxlayan şəxslər, pəhrizində davamlı yenilik edənlərlə müqayisədə daha sürətlə və effektiv şəkildə çəki itirirlər.

Gundem.today xəbər verir ki, beynəlxalq tədqiqatçılar qrupunun əldə etdiyi bu nəticələr "Health Psychology" elmi jurnalında dərc olunub.

Amerika Psixoloji Assosiasiyasının dəstəyi ilə aparılan araşdırmada artıq çəki və piylənmədən əziyyət çəkən 112 nəfər iştirak edib. 12 həftəlik arıqlama kursu müddətində iştirakçılar qəbul etdikləri bütün qidaları mobil tətbiq vasitəsilə qeyd edərək çəkilərinə nəzarət ediblər.

Tədqiqatın müəllifi, Oreqon Səhiyyə və Elm İnstitutunun mütəxəssisi Şarlotta Hagerman bildirir ki, müasir dövrdə sağlam qidalanma vərdişini qorumaq böyük iradə tələb edir. Lakin sabit qidalanma rejimi bu prosesi avtomatlaşdırır və insanın sağlam qərarlar qəbul etməsini asanlaşdırır.

Alimlər araşdırma zamanı iki əsas amili təhlil ediblər:

Kalori sabitliyi: Gündəlik alınan kalori miqdarının nə dərəcədə dəyişməsi.

Rasionun təkrarlanması: İnsanın eyni qidaları hansı tezliklə qəbul etməsi.

Məlum olub ki, daha sabit pəhriz saxlayanlar çəkilərinin orta hesabla 5.9%-ni, rasionunu tez-tez dəyişənlər isə cəmi 4.3%-ni itiriblər. Statistikaya görə, alınan kalorilərin hər 100 kkal fərqlənməsi arıqlama effektivliyini 0.6% aşağı salır.

Tədqiqatçılar bu nəticəni qida seçiminin sadələşdirilməsi ilə əlaqələndirirlər. Qidalanma rejimi əvvəlcədən bəlli olduqda, insanların hədəflərindən yayınması və proqramdan kənara çıxması daha çətin olur.

Maraqlı məqamlardan biri də budur ki, istirahət günlərində daha çox kalori qəbul edən şəxslər belə, rasionu sabit olanlar qrupunda daha uğurla arıqlayıblar. Alimlər bunu qida gündəliyinin dürüst aparılması ilə izah edirlər. Adətən insanlar həftəsonu yedikləri "artıqları" qeyd etməyə meylli olmurlar, lakin yüksək göstəricilər həmin şəxslərin özlərinə qarşı daha dürüst olduqlarını və qeydiyyatı dəqiq apardıqlarını sübut edir.

Əvvəllər pəhrizdə rəngarənglik (müxtəlif meyvə və tərəvəzlər) sağlamlıq üçün əsas şərt sayılırdı. Lakin yüksək kalorili qidaların əlçatan olduğu müasir dünyada, arıqlamaq istəyənlər üçün daha sadə və təkrarlanan qidalanma rejimi daha praktik və effektiv seçimdir.

Xəbər maraqlı gəlib? Sosial şəbəkələrdə paylaşın