Yaya Ture 2009-cu il finalının sirlərini açdı: "Messinin "saxta doqquz" rolu bizi uçurdu"

"Barselona" klubunun keçmiş ulduzu Yaya Ture 2009-cu ildə UEFA Çempionlar Liqasının həlledici final qarşılaşması barədə maraqlı xatirələrini bölüşüb.

Gundem.today xəbər verir ki, sabiq yarımmüdafiəçi Kataloniya təmsilçisinin "Mançester Yunayted" üzərindəki tarixi qələbəsinin məhz mükəmməl taktiki üstünlüklə əldə edildiyini vurğulayıb.

Turenin sözlərinə görə, həlledici matçda İngiltərə nəhənginə qarşı nümayiş etdirilən oyun əsl möcüzəyə bərabər idi:

"2009-cu ilin final matçında hesabı Samuel Eto'O açdı, yekun nöqtəni isə Lionel Messi qoydu. Lakin Messinin qolu Rio Ferdinand və Nemanya Vidiç kimi nəhənglərin arasından başla vuruldu. Onlar fiziki baxımdan olduqca güclü və keçilməz müdafiəçilər hesab olunurdular. Messinin bu baş zərbəsi ilə vurduğu qol isə sözün əsl mənasında möhtəşəm idi.

Həmin vaxt "Mançester Yunayted" komandasına qarşı etdiklərimiz həqiqətən inanılmaz görünürdü. O dövrdə rəqibin heyətində Kriştianu Ronaldu və Ueyn Runi kimi ulduzlar çıxış edirdilər, onlar həm hücum, həm də müdafiə xəttində rəqibə qorxu saçırdılar.

Topu ələ keçirib Xavi, Andres İnyesta və Messiyə ötürdüyümüz anları xatırlayıram. O zaman mən müdafiədə Jerar Pike və Karles Puyolla birgə çıxış edirdim və biz bir-birimizə deyirdik: "Uşaqlar, artıq rahat nəfəs ala bilərik, sadəcə topu o üçlüyə verin".

Paltardəyişmə otağında baş məşqçi Pep Qvardiolanın verdiyi tapşırıqlar yaxşı yadımdadır. O qeyd etmişdi ki, topa sahib olduqdan sonra ehtiyatsız oynamamalıyıq, topu mütləq şəkildə Andres İnyestaya çatdırmalıyıq və həlledici anlarda Messi də topla təmin edilməlidir.

Məhz həmin dövrdə futbol ictimaiyyəti "saxta doqquz" termini barədə danışmağa başladı. Messi meydanın hər bir nöqtəsində hərəkət edirdi, bəzən öz mövqeyini tərk edərək rəqib müdafiəsində boşluqlar yaradırdı və bu manevrlər Ferdinandla Vidiçi tamamilə çaşdırırdı. Rəqib müdafiəçilər sabit mövqeli "9 nömrə"yə qarşı oynamağa vərdiş etmişdilər, ancaq Messi daim yerini dəyişirdi.

Bəzən elə anlar olurdu ki, mərkəz zonasında 4-5 futbolçumuzla rəqibin 2-3 oyunçusuna qarşı üstünlük yaradırdıq və onlar bu vəziyyətdə nə edəcəklərini bilmirdilər. Müdafiəçilərdən biri irəli atılır, digəri isə arxada qalırdı və oyunun taleyini həll edən əsas fərq də elə bu detal idi. Biz bu üstünlüyü matçın ilk 10 dəqiqəsindən etibarən hiss etməyə başladıq. Messi tez-tez arxaya çəkilərək oyunun gedişatını mükəmməl şəkildə oxuyurdu. Onun nümayiş etdirdiyi oyun inanılmaz idi və məhz hadisələri əvvəlcədən görmə bacarığı ilə fərqlənirdi".

Qeyd edək ki, həmin tarixi final qarşılaşmasında "Barselona" rəqibini 2:0 hesabı ilə məğlub edərək nüfuzlu turnirin baş mükafatına sahib çıxmışdı.

Xəbər maraqlı gəlib? Sosial şəbəkələrdə paylaşın