Azərbaycanlı repçi üçün Moskvada "qara zolaq": Bir saat içində aktrisanın ölümü və metal yığınına dönən "Ferrari" - FOTO/VİDEO

Əslən azərbaycanlı olan tanınmış rusiyalı reper Nəvai (Nəvai Bəkirov) düşdüyü avtoqəza ilə əlaqədar istintaqın nəticəsindən asılı olaraq sürücülük hüququndan məhrum edilə və ya həbs cəzası ala bilər.

Gundem.today xəbər verir ki, bu barədə 5-tv.ru məlumat yayıb.

Xəbərdə qeyd edilir ki, populyar ifaçı Rusiya paytaxtının mərkəzində dövlət nömrə nişanı olmayan "Ferrari"nin idarəetməsini itirərək onu səkiyə çırpıb. Bu hadisədən cəmi bir saat öncə isə şəhərin yaxınlıqdakı rayonlarından birində aktrisa Kseniya Dobromilova yol-nəqliyyat hadisəsində həyatını itirib. Qeyd edək ki, mərhum aktrisa məhz Nəvainin musiqi klipindəki rolundan sonra tanınmışdı. Sosial şəbəkələrdə "Müharibə qızı" adlandırılan aktrisa təhlükəli fotosessiya zamanı dünyasını dəyişib.

Dəhşətli qəzaların təfərrüatı

Bolşaya Doroqomilovskaya küçəsində qeydə alınan qəzanın qorxunc kadrları yayılıb. Videoda bir neçə motosikletin yüksək sürətlə hərəkət etdiyi görünür. Onlardan biri anidən idarəetmədən çıxaraq qadın fotoqrafa çırpılır.

Məlumata görə, Kseniya Dobromilova ideal kadr tutmaq məqsədilə avtomobil yolunun düz ortasında, orta zolaqda dayanıbmış. Uzun müddət baykerlərin çəkilişlərini edən fotoqraf mükəmməl kadrlar naminə həyatını riskə atmaqdan çəkinmədiyini sosial şəbəkə hesablarında da dəfələrlə vurğulamışdı.

"Motosikletin parçaları Doroqomilovskaya küçəsinə yayılıb. Qadını vurduqdan sonra motosiklet bir neçə metr kənara düşüb. Hadisə yerindəki qalıqlar və motosikletin özü ağır mənzərə yaradır", - deyə "İzvestiya"nın müxbiri İvan Litomin hadisə yerindən məlumat verib.

Yayılan məlumatlara əsasən, motosikleti idarə edən şəxs Maksim Zaviruxadır. Onun polis avtomobilində hadisə ilə bağlı izahat verdiyi bildirilir. Tibb işçilərinin fotoqraf Kseniya Dobromilovanı xilas etmək cəhdlərinə baxmayaraq, o, təcili tibbi yardım maşınında dünyasını dəyişib. Qeyd etmək lazımdır ki, Kseniya fotoqraflıqla yanaşı, aktrisalıqla da məşğul olub. O, həmçinin məşhur "HammAli & Navai" duetinin kliplərində rol almışdı.

Klipin ifaçılarından biri olan Nəvai Bəkirovun da Kseniyanın qəzası ilə demək olar ki, eyni vaxtda avtomobil qəzasına düşdüyü aydınlaşıb.

"Bolşaya Doroqomilovskaya küçəsindəki və Mədəniyyət parkı yaxınlığındakı qəzalar arasında cəmi saatyarım fərq var. Reper Nəvaiyə məxsus "Ferrari" böyük sürətlə hərəkət edərək səkiyə çıxıb və ağaca çırpılıb", - deyə İvan Litomin qeyd edib.

Qəza anının videosunda avtomobilin səkiyə çırpıldığı, sürüşdüyü və yenidən yola qayıtdığı əks olunur.

Toqquşma nəticəsində avtomobilin təhlükəsizlik yastıqları açılıb. Nəqliyyat vasitəsində cəmi iki nəfər olub - sürücü və sərnişin. Sükan arxasında reperin konsert meneceri Rauf Həsənov olub. O, verdiyi müsahibədə maşını idarə etdiyini təsdiqləyib.

Hazırda hüquq-mühafizə orqanları hər iki yol-nəqliyyat hadisəsi üzrə araşdırma aparır. Bolşaya Doroqomilovskaya küçəsində qəza törədən motosikletçi və reper Nəvainin konsert meneceri ifadə vermək üçün polis bölməsinə aparılıblar. Qadın fotoqrafın ölümünə səbəb olan motosikletçi cinayət məsuliyyətinə cəlb oluna bilər.

Xəbər maraqlı gəlib? Sosial şəbəkələrdə paylaşın