Dubay-Marina və "Dubai Internet City" əraziləri sursat qalıqlarından zərər görüb

ABŞ-nin "Oracle" şirkətinin binasına İranın zərərsizləşdirilən sursat parçalarının düşməsi nəticəsində kiçik ziyan dəyib.

Gundem.today xəbər verib ki, bu barədə BƏƏ-nin Dubay Əmirliyinin rəsmiləri məlumat yayıb.

"Ələ keçirilən mərmidən qalan qalıqlar "Dubai Internet City" ərazisindəki "Oracle" binasının üzərinə düşüb və fasadına kiçik ziyan vurub. İtki barədə məlumat verilməyib", - deyə regional hökumətin mətbuat mərkəzi açıqlamada bildirib. Şəhər səmasında hava hücumundan müdafiə sistemləri tərəfindən məhz hansı sursatın zərərsizləşdirildiyi açıqlanmır.

Bundan başqa, Birləşmiş Ərəb Əmirliklərinin (BƏƏ) Dubay şəhərində yerləşən bina da hərbi sursatın qalıqlarının düşməsi nəticəsində zərər görüb. Əmirliyin rəsmilərinin verdiyi məlumata görə, hadisə nəticəsində xəsarət alan yoxdur.

"Vurulmuş mərminin qalıqları Dubay-Marina ərazisindəki binanın fasadına düşüb. Yanğının baş verməsi və ya hadisə nəticəsində xəsarət alanların olması barədə məlumat daxil olmayıb", - deyə Dubay administrasiyasının mətbuat xidmətinin bəyanatında bildirilir. Dəyən maddi ziyanın miqyası barədə dəqiq məlumat verilmir.

Xəbər maraqlı gəlib? Sosial şəbəkələrdə paylaşın