Ən parlaq C/2025 R3 kometası Günəş sistemini həmişəlik tərk edir

Səmadakı ən parlaq kometa kimi tanınan C/2025 R3 Günəş sistemini həmişəlik tərk etməyə hazırlaşır.

Gundem.today-ın məlumatına görə, Kosmik Tədqiqatlar İnstitutunun (XRAS) yaydığı rəsmi açıqlamada hazırda müşahidə edilə bilən 100-ə yaxın kometa arasında ən çox işıq saçan C/2025 R3 (PanSTARRS) kosmik cisminin sistemimizdən uzaqlaşdığı bildirilir. Aparılan elmi hesablamalar sübut edir ki, Günəş bu obyekti kənara itələyir - onun hərəkət trayektoriyası dəyişib və bu kometa Yer kürəsi ilə Günəşin yaxınlığından özünün sonuncu uçuşunu həyata keçirir.

Qeyd edək ki, sözügedən göy cismi keçən ilin sentyabrında Yerdən təqribən bir işıq ili uzaqlıqda olan nəhəng asteroid və kometa yığını kimi tanınan Oort Buludunda aşkarlanıb. LASCO teleskopunun son üç gün ərzində qeydə aldığı kadrlar nadir kosmik mənzərəni nümayiş etdirib: kometa Günəşlə Yer arasında 75 milyon kilometrlik məsafədən asta sürətlə süzülüb. İndi onu onmilyonlarla il davam edəcək sonsuz boşluq gözləyir, lakin uzaq gələcəkdə başqa ulduz sistemləri ilə rastlaşma ehtimalı olduqca yüksəkdir. Xatırladaq ki, daha öncə 2026-cı ilin ən parlaq kometası hesab olunan C/2026 A1 kosmik obyekti Günəşə maksimum yaxınlaşaraq məhv olmuşdu. Qədim dövrlərdə parçalanmış nəhəng kometanın qalıqlarından ibarət Kreutz qrupuna aid olan bu cisim yoxa çıxdıqdan sonra məhz C/2025 R3 səmada ən parlaq kometa statusunu qazanmışdı.

Xəbər maraqlı gəlib? Sosial şəbəkələrdə paylaşın