İranlı nazir ABŞ universitetlərindən xaric edilən həmvətənlərinə səsləndi

ABŞ universitetlərindən xaric edilən tələbələr və müəllim heyəti İran təhsil müəssisələrinə qəbul ediləcək.

Gundem.today-ın xəbərinə görə, bu barədə SNN İranın Elm, Tədqiqat və Texnologiya naziri Hüseyn Simai Sarafa istinadən məlumat verib.

"ABŞ hakimiyyətinin bəzi tələbələrimizi hüquqi və etik normalara zidd olaraq xaric etdiyini nəzərə alaraq bildirirəm ki, ABŞ universitetlərindən xaric edilən bütün şəxslər məmnuniyyətlə İrandakı ekvivalent təhsil müəssisələrinə qəbul olunacaqlar", -deyə açıqlamada vurğulanıb.

O, həmçinin tələbələri və müəllim heyətini işlərini və akademik vəzifələrini itirməkdən narahat olmamağa çağırıb.

Xatırladaq ki, fevralın 28-də İsrailin müdafiə naziri İsrael Kats ordunun İrana qarşı qabaqlayıcı zərbələr endirdiyini elan edib. Hücumlar paytaxt Tehran da daxil olmaqla, İranın iri şəhərlərini hədəf alıb. Nəticədə hər iki dövlət öz hava məkanını bağlayıb. Ardınca ABŞ Prezidenti Donald Tramp da Vaşinqtonun bu hərbi hərəkata qoşulduğunu bildirib. Pentaqon Birləşmiş Ştatların missiyasını "Epik qəzəb" adlandırıb. Ağ Ev bu hücumun səbəbini İslam Respublikasının yaratdığı ehtimal olunan raket və nüvə təhlükələri ilə izah edib. Buna cavab olaraq İran İsrail istiqamətində onlarla ballistik raket buraxıb. Bununla yanaşı, İran Yaxın Şərq regionunda - Qətər, Birləşmiş Ərəb Əmirlikləri, Bəhreyn, İraq, Səudiyyə Ərəbistanı və İordaniyadakı ABŞ bazalarını raketlər və dronlarla vurduğunu açıqlayıb. Rəsmi Tehran bu həmləsini "Əsl vəd-4" əməliyyatı kimi təqdim edib. Yaxın Şərqdə şiddətlənən genişmiqyaslı toqquşmalarda indiyədək 1 300-dən çox şəxs həyatını itirib. İtkilərin mütləq əksəriyyəti İrandandır, lakin ölənlər sırasında Bəhreyn, İsrail, Küveyt, Livan və BƏƏ vətəndaşları, eləcə də ABŞ hərbi qulluqçuları yer alıblar.

Aprelin 8-də Pakistan tərəfinin vasitəçilik səyləri nəticəsində ABŞ və İran arasında 14 günlük atəşkəs razılaşması əldə olunub.

Xəbər maraqlı gəlib? Sosial şəbəkələrdə paylaşın