İsrail prezidenti Livana avtomobillə getməyi arzulayır

İsrail Prezidenti İsxak Hersoq Livanla mehriban qonşuluq əlaqələri yaratmaq istədiyini bəyan edib.

Gundem.today xəbər verir ki, bu barədə dövlət başçısının dəftərxanası onun çıxışına istinadən məlumat yayıb. İsrailin Müstəqillik Günü münasibətilə diplomatlar üçün təşkil olunan qəbulda çıxış edən dövlət başçısı, Beyruta sərbəst şəkildə avtomobillə getməyi və Livan vətəndaşları ilə dostluq etməyi xəyal etdiyini vurğulayıb.

"İsrail oğul və qızlarımızın qorxu deyil, yeni imkanlar əldə edəcəyi bir Yaxın Şərq qurmağa kömək etmək üçün sizin hər birinizlə əməkdaşlığı səbirsizliklə gözləyir. Onlar gələcək nəsillərə dünənin münaqişələrini deyil, sabahın ümidlərini miras qoymalıdırlar. Bu yaxınlarda israilli məktəblilərə bildirdim ki, avtomobilə əyləşib birbaşa Beyruta yollanmaq arzusundayam. O gözəl şəhəri ziyarət etmək, bizim kimi daha yaxşı gələcək üçün dua edən yaxşı Livan insanları ilə dost olmaq istəyirəm", - deyə o əlavə edib.

Bununla əlaqədar olaraq, prezident aprelin 23-də Vaşinqtonda növbəti təmaslar raundunu keçirəcək İsrail və Livan nümayəndə heyətlərinə uğurlar arzulayıb. "İsrail və Livan arasında sülhün əldə olunmasında onlara böyük nailiyyətlər arzulayıram. Lakin bunun reallaşması üçün İsrail öz sərhədlərinin təhlükəsizliyini təmin etməlidir", - deyə Hersoq qeyd edib.

Xəbər maraqlı gəlib? Sosial şəbəkələrdə paylaşın