Lebron Ceyms NBA tarixində oğluna ötürmə edən ilk oyunçu oldu - FOTO - VİDEO

"Los-Anceles Leykers" klubunun ulduz hücumçusu Lebron Ceyms Milli Basketbol Assosiasiyasının (NBA) tarixinə adını yenidən yazdıraraq, rəsmi matçda oğluna məhsuldar ötürmə edən ilk basketbolçu kimi yadda qalıb.

Gundem.today TASS-a istinadən xəbər verir ki, "Leykers"in öz meydanında "Bruklin"i 116-99 hesabı ilə məğlub etdiyi oyunda tarixi hadisə reallaşıb.

Lebron Ceyms oğlu Bronni Ceymsə dəqiq ötürmə edərək onun fərqlənməsinə şərait yaradıb. Bu yaddaqalan oyunda Lebron 14 xal, 6 ribaund və 8 məhsuldar ötürmə ilə yadda qaldığı halda, Bronni komandasının aktivinə 3 xal yazdırıb.

Hazırda 41 yaşı olan Lebron Ceyms dördqat NBA çempionu olmaqla yanaşı, həm müntəzəm mövsümün, həm də final seriyasının ən dəyərli oyunçusu titullarının sahibidir. Əfsanəvi basketbolçu, həmçinin liqa tarixinin ən çox xal toplayan və ən uzun karyera mövsümü keçirən rekordçusu ünvanını da daşıyır. Qeyd edək ki, bu, Ceymsin peşəkar NBA karyerasındakı 23-cü mövsümüdür.

Onun 21 yaşlı oğlu Bronni Ceyms isə NBA draftında ümumi sıralamada 55-ci nömrə altında seçilib və 3 iyul 2024-cü il tarixində "Leykers" klubu ilə özünün ilkin müqaviləsinə imza atıb. Xatırladaq ki, gənc basketbolçu peşəkar karyerasından əvvəl "Sierra Canyon" liseyinin komandasında çıxış edib.

Xəbər maraqlı gəlib? Sosial şəbəkələrdə paylaşın