Məsud Pezeşkian İranın heç vaxt razılaşmayacağı şərti açıqladı

"İran yalnız dialoq və digər ölkələrlə konstruktiv münasibətlərin qurulmasının tərəfdarıdır".

Gundem.today xəbər verir ki, bunu İran Prezidenti Məsud Pezeşkian "Telegram" kanalında yazıb.

"İran müharibəyə və qeyri-sabitliyə can atmır və yalnız dialoq və müxtəlif ölkələrlə konstruktiv əməkdaşlıq tərəfdarıdır. Lakin İslam Respublikasına öz iradəsini qəbul etdirmək və ya onu kapitulyasiyaya məcbur etmək üçün hər hansı cəhd uğursuzluğa məhkumdur. İran xalqı heç vaxt belə yanaşma ilə razılaşmayacaq", - deyə Pezeşkian bildirib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Xəbər maraqlı gəlib? Sosial şəbəkələrdə paylaşın