Nobel Sülh Komitəsi İranı Nərgiz Məhəmmədini azad etməyə çağırdı

Nobel Sülh Komitəsi İran hökumətindən siyasi məhbus və Nobel Sülh Mükafatı laureatı Nərgiz Məhəmmədinin azad edilməsini tələb edib.

Gundem.today xəbər verir ki, bu barədə "Reuters" məlumat yayıb.

Komitənin rəhbəri Yorgen Vatne Fridnes bildirib ki, Məhəmmədinin səhhəti ciddi şəkildə pisləşib və onun təcili tibbi müalicəyə ehtiyacı var.

Qeyd edək ki, fəalın səhhəti həbsxanada kəskin ağırlaşdıqdan sonra o, Zəncan şəhərində xəstəxanaya yerləşdirilib. Bildirilir ki, onda huşun itirilməsi halları və ağır infarkt qeydə alınıb.

Nobel Sülh Mükafatının iranlı laureatı, hüquq müdafiəçisi Nərgiz Məhəmmədinin səhhəti pisləşdiyi üçün xəstəxanaya yerləşdirilib.

Gundem.today-ın "AFP" nəşrinə istinadən xəbərinə görə, bu barədə onun yaxın ətrafı məlumat veriblər.

Nərgiz Məhəmmədinin fondunun açıqlamasına görə, vəziyyətinin sürətlə pisləşməsi, iki dəfə huşunu itirməsi və ağır infarkt səbəbindən, o, təcili olaraq Zəncandakı xəstəxanaya köçürülüb. Birinci dəfə ürəyi getdikdən sonra, o, Zəncan xəstəxanasına yerləşdirilməkdən imtina edib. Baxmayaraq ki, daha əvvəllər mürəkkəb cərrahi tarixçəsinə görə ona müalicə üçün Tehranda müəyyən həkimlərə müraciət etmək tövsiyə olunmuşdu. Lakin vəziyyəti pisləşdikdən sonra həbsxana həkimi Nərgiz Məhəmmədinin təcili olaraq xəstəxanaya yerləşdirilməsini əmr edib.

Nəşr qeyd edir ki, hüquq müdafiəçisi təcili terapiya şöbəsinə yerləşdirilib, lakin onun qan təzyiqi kəskin şəkildə dəyişməyə davam edir.

Nərgiz Məhəmmədinin ailəsi iddia edir ki, qərar son anda verilib və artıq çox gec ola bilər. Onların sözlərinə görə, hakimiyyət orqanları onun sağlamlıq durumu kəskinləşənə qədər tibbi məsləhətlərə məhəl qoymayıblar.

Qeyd edək ki, Nərgiz Məhəmmədi ötən il dekabrın 12-də Məşhəd şəhərində vəkil Xosrov Alikurdinin xatirəsinə həsr edilən mərasimdə bir neçə digər fəalla birlikdə həbs edilib.

Xatırladaq ki, hüquq müdafiəçisi İranda görüşlər təşkil etmək, gizli sövdələşmə və təbliğat aparmaqda ittiham olunduğu üçün azadlıqdan məhrum edilmişdi.

Xəbər maraqlı gəlib? Sosial şəbəkələrdə paylaşın