"Sabah" - "Qarabağ" matçından sonra Yankoviç tuneldə hakimə hücum çəkibmiş - ANBAAN GÖRÜNTÜLƏR

Azərbaycan Kubokunun yarımfinalında "Qarabağ" və "Sabah" komandaları arasında keçirilən gərgin matçın ardından xoşagəlməz hadisə yaşanıb. "Qarabağ"ın yarımmüdafiəçisi Marko Yankoviç oyunun bitməsindən sonra baş hakim Rəvan Həmzəzadəyə qarşı aqressiv davranış nümayiş etdirib.

Gundem.today xəbər verir ki, bu barədə görüntülər "CBC Sport" kanalında yayımlanıb.

Monteneqrolu futbolçu 90+6-cı dəqiqədə penalti təyin edilməməsinə görə hakim idarəçiliyinə sərt etirazını bildirib. Meydançada hakimlərə hücum çəkdiyi üçün qırmızı vərəqə ilə cəzalandırılan Yankoviç təhlükəsizlik qüvvələri tərəfindən meydandan çıxarılsa da, sakitləşməyib.

O, paltardəyişmə otağına gedən tuneldə yenidən hakimlərə yaxınlaşaraq onlara fiziki təzyiq göstərməyə cəhd edib. Yaranmış gərginliyi yalnız baş məşqçi Qurban Qurbanovun müdaxiləsi ilə bir qədər səngitmək mümkün olub. Daha sonra asayiş keşikçiləri futbolçunu hakimlər otağının önündən uzaqlaşdırıblar.

Qeyd edək ki, hadisə zamanı "Qarabağ"ın digər üzvləri - Toral Bayramov, Coni Montiel və Musa Qurbanlının da stadionda hakimlərə qarşı etiraz və hücum cəhdləri olub.

Xəbər maraqlı gəlib? Sosial şəbəkələrdə paylaşın