Azərbaycan ötən il Çexiyanın ən böyük neft tədarükçüsü olub

Azərbaycan 2025-ci ilin yekunlarına görə Çexiyanın ən böyük neft tədarükçüsü olub.

Gundem.today "České Noviny" resursuna istinadən xəbər verir ki, Azərbaycan Çexiyanın neft idxalının 42%-dən çoxunu təmin edib.

Bildirilir ki, Rusiya isə bu bazarda çoxillik liderliyini itirib. Rusiyanın payı bir il əvvəlki 42% və əvvəlki illərdəki 50%-dən çox göstəricidən 7,7%-ə düşüb. Ümumilikdə, Çexiya 2025-ci ildə 6,85 milyon tondan çox neft idxal edib ki, bu da illik müqayisədə 5,5% çoxdur. Rusiyanın payının azalması mart ayında "Drujba" neft kəməri ilə tədarüklərin dayandırılması ilə bağlıdır və bu tədarüklər hələ də bərpa olunmayıb.

Tədarük həcminə görə ikinci yerdə Norveç (təxminən 20%), üçüncü yerdə isə Qazaxıstan (18%) qərarlaşıb.

Neftin əsas həcmi Çexiyaya TAL sistemi ilə əlaqəli olan IKL boru kəməri vasitəsilə daxil olur.

Xəbər maraqlı gəlib? Sosial şəbəkələrdə paylaşın