Finlandiya pasportu almaq çətinləşdi: 2027-ci ildən yeni qaydalar işə düşəcək

Finlandiya Nazirlər Kabineti vətəndaşlıq imtahanının tətbiq edilməsi barədə qərar qəbul edib. Bu addım Finlandiya pasportuna sahib olmaq prosedurlarını daha da sərtləşdirir.

Gundem.today xəbər verir ki, bu barədə ölkə hökumətinin mətbuat xidməti məlumat yayıb.

Rəsmi bəyanatda bildirilir ki, imtahanın tətbiqi vətəndaşlıq almaq şərtlərini çətinləşdirən islahatın yekun mərhələsidir. Bundan əvvəl ölkədə yaşama müddəti, şəxsi dürüstlük və gəlir meyarları ilə bağlı qanunvericiliyə müvafiq dəyişikliklər edilib.

Daxili işlər naziri Mari Rantanen məsələ ilə bağlı bunları vurğulayıb: "Finlandiya vətəndaşlığı heç kimə avtomatik şəkildə verilmir. Yeniliklərin əsas hədəfi cəmiyyətə inteqrasiyanı, işlə təminatı və Finlandiya qanunlarına əməl olunmasını stimullaşdırmaqdır".

Yeni qaydalara əsasən, vətəndaşlıq almaq istəyənlər ölkə barədə ictimai məlumatlılıq səviyyələrini xüsusi sınaq imtahanı ilə sübut etməlidirlər. Bununla yanaşı, tələb olunan bilikləri Finlandiya və ya İsveç dillərində tam orta təhsil attestatı, yaxud ali məktəb diplomu ilə də təsdiqləmək mümkündür.

İmtahanda iştirakçılara Finlandiya cəmiyyətinin təməl qanunları, insan haqları, hüquq və gender bərabərliyi, eləcə də ölkənin tarixi və mədəniyyəti barədə suallar təqdim olunacaq. Onlayn formatda təşkil ediləcək sınaq prosesinə Finlandiya Miqrasiya Xidməti nəzarət edəcək. Yeni dəyişikliklər 2027-ci ilin əvvəlindən etibarən hüquqi qüvvəyə minəcək.

Xəbər maraqlı gəlib? Sosial şəbəkələrdə paylaşın