Türkiyədə meşəni yandıran 21 yaşlı gənc həbs olundu

Türkiyənin Kahramanmaraş vilayətinin Onikişubat rayonunda 92 hektar ərazinin yanması ilə nəticələnən meşə yanğını törətməkdə təqsirli bilinən 21 yaşlı M.S.-yə məhkəmə tərəfindən hökm oxunub.

Gundem.today xəbər verir ki, bu barədə "TRT Haber" məlumat yayıb.

Məhkəmənin qərarı ilə təqsirləndirilən şəxs ehtiyatsızlıqdan meşə yanğınına səbəb olma maddəsi ilə 5 il 6 ay 20 gün müddətinə azadlıqdan məhrum edilib. Bununla yanaşı, yanğının nəticələrinin aradan qaldırılması və meşənin bərpası üçün dövlətin çəkdiyi 43.75 milyon lirə dəyərində olan xərclərin də ondan alınmasına qərar verilib.

Qeyd edilib ki, hadisə 2024-cü il iyulun 28-də Suçatı bölgəsində qeydə alınıb. İstirahət zamanı M.S.-nin zarafat məqsədilə atdığı fişəng quru otların alışmasına səbəb olub və alov qısa müddətdə meşə zolağına keçib. Yalnız 18 saatdan sonra nəzarət altına alına bilən yanğının söndürülməsi əməliyyatına meşə təsərrüfatının 200-ə yaxın işçisi, onlarla texnika və aviasiya vasitələri cəlb edilib. Təbiətə dəyən maddi ziyanın məbləği 43,75 milyon lirə olaraq qiymətləndirilib.

Xəbər maraqlı gəlib? Sosial şəbəkələrdə paylaşın