FIFA prezidenti DÇ finalına iki milyon dollara bilet alanlara nə vəd etdi?

FIFA prezidenti Canni İnfantino DÇ-2026-nın finalına iki milyon dollarlıq bilet alan şəxsə şəxsən hot-doq və "Coca-Cola" gətirəcəyini vəd edib.

Gundem.today xəbər verir ki, bu barədə "L'Équipe" nəşri onun sözlərinə istinadən məlumat yayıb.

İnfantino DÇ-2026 biletlərinin baha olmasını yüksək tələbat və ABŞ-də biletlərin rəsmi şəkildə yenidən satışına icazə verilməsi ilə əlaqələndirib:

"Biz mövcud bazarı nəzərə almalıyıq, çünki dünyanın ən inkişaf etmiş əyləncə sektoruna sahib ölkəsindəyik. Buna görə də bazar qiymətlərini tətbiq etməyə məcburuq. Bəzi şəxslər qiymətlərin çox yüksək olduğunu iddia etsələr də, bu biletlər onsuz da sonradan ikiqat bahasına satılır".

Qeyd edək ki, ötən həftə FIFA-nın rəsmi platformasında iyulun 19-da Nyu-Cersidə keçiriləcək final matçı üçün dörd yer satışa çıxarılıb. Həmin biletlərin hər birinin qiyməti təxminən 2.3 milyon dollar təşkil edib.

Aprelin əvvəlində FIFA turnirdəki 104 matçdan 40-nın bilet qiymətlərini artırıb. Final üçün ən bahalı biletin ("1-ci kateqoriya") qiyməti ilin əvvəlindəki 8.7 min dollardan 11 min dollara qədər yüksəlib. Həmçinin Braziliya, Argentina, İngiltərə, Almaniya və Meksika yığmalarının oyunlarına olan biletlərdə də bahalaşma qeydə alınıb.

Xatırladaq ki, futbol üzrə 2026-cı il dünya çempionatı ilk dəfə olaraq 48 komandanın iştirakı ilə keçiriləcək. Turnir eyni zamanda üç ölkənin - ABŞ, Kanada və Meksikanın ev sahibliyi edəcəyi ilk mundial kimi tarixə düşəcək. Mundial iyunun 11-dən iyulun 19-dək davam edəcək.

Xəbər maraqlı gəlib? Sosial şəbəkələrdə paylaşın