Yaponiya silah ixracı qaydalarını yumşaldır

Yaponiya silah ixracı ilə bağlı mövcud qaydalarda yumşalmalara gedir.

Gundem.today xəbər verir ki, bu barədə "Kyodo News" agentliyi məlumat yayıb.

Bildirilib ki, hökumət xaricə silah satışına icazə vermək məqsədilə hərbi texnika ixracına dair məhdudiyyətlərə yenidən baxıb.

"Nazirlər Kabineti və Milli Təhlükəsizlik Şurası tərəfindən təsdiqlənən bu qərar, İkinci Dünya müharibəsindəki məğlubiyyətdən bəri konstitusiyaya əsasən, özünü sülhsevər dövlət kimi mövqeləndirən ölkənin müdafiə siyasətində ciddi bir dəyişiklikdir", - deyə agentlik qeyd edib. Bildirilib ki, bu addım, milli təhlükəsizlik məsələlərində sərt mövqeyi ilə tanınan Sanae Takaiçi hökumətinin, Yaponiyada İkinci Dünya müharibəsinin sonundan bəri ən ağır təhlükəsizlik vəziyyəti adlandırdığı şəraitdə müdafiə sənayesini gücləndirmək səyləri fonunda atılıb.

"Hazırda heç bir ölkə təkbaşına sülh və təhlükəsizliyi təmin edə bilməz, bu səbəbdən müdafiə texnologiyaları kimi sahələrdə bir-birini dəstəkləyən tərəfdaşlara ehtiyac var", - deyə baş nazir bildirib. İndi yalnız beş məqsəd - xilasetmə əməliyyatları, daşınma, xəbərdarlıq, müşahidə və minatəmizləmə - üçün istifadə ediləcək avadanlıqların ötürülməsinə icazə verən əvvəlki məhdudiyyətlər olmadan hər cür texnikanın ixracı mümkün olacaq. Münaqişələrin davam etdiyi ölkələrə ixrac qadağan edilsə də, Yaponiyanın təhlükəsizlik ehtiyaclarını və ABŞ-nin Hind-Sakit okean regionundakı hərbi əməliyyatlarını nəzərə alaraq "xüsusi hallarda" istisnalara yol verilir.

Nazirlər Kabinetinin baş katibi Minoru Kihara vurğulayıb ki, Yaponiya müharibə bitdikdən sonra 80 ildən artıq müddət ərzində formalaşmış sülhsevər dövlət kimi əsas prinsiplərini qoruyub saxlayacaq.

Bildirilib ki, hərbi texnika öldürücü və ya dağıdıcı potensiala malik olub-olmamasından asılı olaraq "silah" və "silah olmayan" kateqoriyalarına bölünəcək. Radiolokasiya sistemləri kimi avadanlıqların ixracı məhdudlaşdırılmayacaq, lakin esmineslər və raketlər daxil olmaqla silahların ixracı yalnız Yaponiya ilə müdafiə texnologiyalarının qorunması haqqında saziş imzalamış ölkələrə mümkün olacaq. Hazırda Tokionun ABŞ və Böyük Britaniya da daxil olmaqla 17 ölkə ilə belə razılaşması var.

Xəbər maraqlı gəlib? Sosial şəbəkələrdə paylaşın